Gaammo dichcha maabara dhoqqa deththa gaththanaw zintha qaaxos wudettidaysa Gaammo dichcha maabara kaaleththancha D/re Injiinere Dubbaale Mandefirootey wozanthida.

Gaammo dichcha maabara ooraththa kaaleththanchati eqotaza dichcha qaaxo mintho qoppoban oothanchatara zoreteththa tobbe ooththida.

Arba Minc’e: Wogayza 10, 2018 M.L(Gaammo Telebizhine):Gaammo dichcha maabara ooraththa kaappoti oothanchatara kaalliza ootho bolla zorettida.Gaammo dichcha maabara huphe ootho polisancha D/re Injiinere Dubbaale Mandefirootey Gaammo dichcha maabaray dereteththan baasettidi dereteththas ooththiza ammaneteththay diza eqota gididaysa qonc’issida.Eqotazi 16 mac’arata shiishshi oyqida, 750 sha’u yarata muruutisidanne dumma dumma haggazota dere asaas immishe diza eqota gididaysaka haasayida.Wodeza daaniza hanotan ootho minthon eqotaza dhoqqa deththa gaththanaysa wozanthida.Issoy haraara diza issipeteththa minthoy, ha’i diza mino miyyetanne pac’e baggata paattidi kaalliza wode oothos giigeteththinne go’iza qofata pultisoy duulatazas ayfe qofa gididaysa D/re Injiinere Mandefirootey qofisida.Gaammo dichcha maabara dhoqqa deththa gaththanaw dereteththanne kumeththa wuday xeellizayta issipeteththa koyizaysa akeekissida.Duulatazan aadhdhida wode ootho polo iripportey shiiqida gidishin yarata c’orisoy, kaalodata wodeppe woden zaareththi qinxisoy, haaro qiic’i go’eteththi, oothanchata yigeththinne saatelayte biiroti ootho doommonta ago pac’eti tishshateththi imetta bessiza wudata gididaysi xomosettides.Duulatan beettidi Gaammo Telebizhines qofa immidaytappe Gaammo dichcha maabara Gaac’c’o Baabba tashe xaafo keeththa kaappo Daanna Doore Adduyinni “timirte, payyateththanne goshsha mac’aratan zambo oothoti polettidaysa shiiqida iripporteppe xomosidos” gida.Diza haaro qiic’i go’eteththinne yarata oythi tishshateththa koyizaysa qofissida Daanna Adduyinni “kaalliza woden pac’eta giigisanaw minnidi ooththana” gida.

Gaammo dichcha maabara Kamba tashe xaafo keeththa kaappo Daanna Matiyoosa Marqoosi duulatazi kaalliza woden pac’e baggata giigisanaw hidha qaada gididaysa haasayida.

Maabara yarata qodimaaga oytha bolla tishshateththan ooththanaysanne doomettida oothota minthidi efanaysaka qofisida.

Wurseththan Gaammo dichcha maabara yarati Arba Minc’e salo gufantho istaadeemes lootore shamoninne istaadoome yuuyi xeelon duulatay kuuyettides.